Rilindja e hajdutëve

Rilindja e hajdutëve

Nëse ka diçka që vërtet ka ndryshuar me ardhjen e Edi Ramës në pushtet, ajo është rilindja e një lloji të ri grabitjeje, atij përmes koncesioneve. Pak ditë më parë, me një shkrim të detajuar dhe tejet profesional, revista Monitor, kishte hartuar një ekspoze të plotë të asaj që ka bërë dhe po planifikon të bëjë qeveria socialiste.

Shkruan: Andi Bushati

Shifrat janë të frikshme.

Jo vetëm sepse një parti e majtë po dorëzon shtetin tek privatët.

Jo vetëm sepse planifikohen të jepen rreth 70 koncesione (në rrugë, transporte, dogana, shëndetësi, shërbime të tjera publike).

Jo vetëm sepse Ministria e Shëndetësisë ka hapur një thes të madh, 200 milionë euro në vit, për miqtë dhe klientët e Ramës, duke dhënë me koncesion, check -upin, hemodializën, sterilizimin dhe mbetjet spitalore.

Të gjitha këto janë njolla më vete. Një çmenduri financiare dhe një fushë e pamatë për abuzim.

Por njëkohësisht me shifrat, me dhënien e milionave pa garë, me “dhuratat” për miqtë dhe me riblerjen e ish klientëve të qeverisë Berisha, kjo strategji shkatërrimtare ka hapur edhe probleme të tjera të mëdha:

Së pari, ajo po e dorëzon shtetin tek një oligarki e dyshimtë duke ngritur një pikpyetje të madhe: përse ka vlerë që paskësaj shqiptarët të vazhdojnë të votojnë për përfaqësuesit e tyre politikë, kur edhe doganat edhe financat, edhe pullat fiskale edhe ngjyrimi i naftës edhe analizat mjekësore edhe rrugët edhe transporti i kontrollohen nga njerëz që nuk i nënshtrohen kësaj vote?

Së dyti, ajo po shndërron në tallje dilemën për ndryshimin apo jo të pushtetit, sepse të gjitha këto koncesione po jepen me periudha të mëdha afatgjata (10 vjet dhe më tepër) që e kalojnë më shumë se dyfishin e një mandati qeveritar.

Së treti ato e rëndojnë disa here xhepin e qytetarëve shqiptarë. Sepse duke dhënë me koncesion përpos veprave të mëdha (psh: Rruga e Kombit për “dhurimin” e së cilës flitet se po bëhen pazare të paimagjinueshme) e njëjta mënyrë po përdoret edhe për shërbimet. Dhe kështu njerëzit detyrohen të paguajnë edhe administratën publike që nuk është ulur aspak në numër edhe privatët që prezumohet tu shërbejnë.

Dhe në fund ato po rezultojnë jo efikase. Ngjyrosja e naftës nuk funksionon. Rapiskani i bënte tregtarët të paguanin dy herë dhe faktet treguan se droga u kalon nën mustaqe. Crown Agent megjithëse morri plot 8.5 milion euro, bëri një gropë të madhe në dogana. Kolegë gazetarë kanë raportuar se disponojnë fatura të rreme sikur një fshat i tëre e ka bërë në mënyrë fallco check-upin mjekësor. Kudo duken shenjat e vjedhjes dhe shpërdorimit.

Por pyetja që lind pas kësaj është: a nuk i di kryeministri Rama këto? A nuk e kupton administrata e tij se ka hyrë në një spirale të çmendur shpërdorimesh?

Natyrisht që do ishte naive të kishe dilema për këto pikëpyetje.

Ato më parë se zbulimi i një strategjie të re për shtetin e vogël, janë aplikimi i një mënyre të re për të vjedhur. Fiks ashtu sikurse deklamoi një deputet socialist në prag të fushatës elektorale: “ne do të vjedhim ndryshe”.

Rama dhe ekipi i tij kanë vendosur të vjedhin ndryshe dhe të sigurtë.

Sepse në fakt, rrugën e koncesioneve abuzive nuk e nisën ata, por qeveria paraardhëse e Berishës. Socialistët atë kohë në opozitë, deklaruan me forcë se do ti anulonin pjesën më të madhe të këtyre marrëveshjeve në dëm të shqiptarëve.

Për hir të vërtetës tentuan dhe dështuan. Sepse mekanizmat e shtetit ligjor dhe gjykatat ndërkombëtare, nuk janë të gatshme ti anulojnë vendimet e një shteti, sado qeveri e keqe që ti ketë marrë përsipër ato.

Dhe me sa duket, ky dështim, jo vetëm nuk i mërziti socialistët rishtarë në pushtet, për mosmbajtjen e zotimeve elektorale, por në të kundërt i mësoi atyre një rrugë të re: se me anë të koncesioneve mund të vidhet në mënyrë të qetë dhe të patjetërsueshme.

Dhe zagarët u lëshuan nga zinxhirët.

Të sigurtë se kishin rilindur një mënyrë të re grabitjeje.

Mjafton të lexosh raportin e detajuar të “Monitor” (shiko poshtë ) për ta kuptuar këtë. Ai vërteton se të paktën rilindasit një premtim e kanë mbajtur. Ata për të grabitur tjetërlloj.

more recommended stories